نسر

 بعد مازرت مصر اكتشفت اني فوتت حاجه مهمه جدا. هي اني اعد مع بابا وماما واتكلم معاهم بدون حساب مواعيد او بص في الساعه ونعد نقرأ قرآن ونتكلم ونضحك، وطبعا بابا مش هشبع منه ولا يشبع مني زي ماكان دايما زمان بييجي بعد مايكون استحما وييجي ينام وياخدني فحضنه وانا عيل صغير ويعد يكلمني ويحكيلي حواديت، فاكر يا بابا كنت بتعد تسرح دقنك وشعرك بعد الحموم وانت مبلول وبتبقي لسه بتنشف رجلك وتيجي الاوضه والدنيا بليل والنور مقفول ونستعد ننام وننام جنب بعض ايام الشقه اللي تحت بتاعت عمتو هدى

اكتشفت ان اقيم شئ في الحياة بين الناس هي العلاقه الناجحه والتواصل اللغوي الفعال. بالنسبالي هو اني اقعد واتكلم مع حد بالذات بحبه وقريب مني وكمان والدي بابايا شخصيا فدا شئ لا يقدر بثمن. طبعا عملت كدا كتير ولكن مش كفايه. يارب اكررها الزياره واعمل كدا واقوم مع بابا بدري من الصبح واشوف هيعمل ايه ورجلي علي رجله علي طول لاني بجد وبصدق مش راضي عن اسلوبي ابدا السفريه اللي فاتت. 

بالنسبالي الحديث مع شخص بحبه في حوار مهم ومفيد وطويل دا شي عندي بالدنيا بحس اني قاعد اخد جرعه افيون او كوكايين وبتكيف جدااا بحاجه زي دي… عذرا يا بابا علي المثال دا ولكن يبدو انه بيوضح الشعور وطبعا انا الحمد لله مش مدمن، انا مدمن كلام بس

اكتشفت نفسي من حوالي ٣ سنين

مكنتش اعرف اي حاجه بالشكل الواضح اللي انا عليه دا فعلا غير من الفتره القريبه دي

افضل مثال اقدر اوصف بيه نفسي هو النسر، انا نسر طااااير فوووق عالي جدا بعيد عن الارض، باصص عالارض تحت وعالناس وشايفهم وعارفهم كويس جدا، مهما حصل ايه فحياته تحت عالارض هو عارف انه في الاخر طاير فوق والحياه مع الناس والمشاكل والصعوبات اللي بيواجهها دي ولا حاجه، هو في الاخر اصلا مش بيتلمس وطاير فوووق بعيد مفيش حاجه لا بتوصله ولا بتلمسه ومش بيتأثر بأي حاجه بتحصل حواليه

مهما يقول الناس عنه او ظنهم فيه كدا كدا مابيتلمسش ولا بتوصله حاجه منهم. مكتفي بذاته وقوي ومستعد بايمانه بالله وبمعرفته بنفسه انه نسر ويقدر يعتمد علي نفسه… 

زمااان بابا قاللي كتييير جدا، مايهمكش ابدا كلام الناس او رأيهم، اعرف انك بنفسك شخص نضيفه واحسن من الناس كلها (طبعا بدون كبر) كذا مره وفاكر كويس جدا ان بابا قاللي الموضوع دا كتير 

دايما حس واعرف انك (احسن من الناس كلها) انت احسن واحد، ايه يعني مناظر وفلوس ولبس وعربيات… فعلا كلامك يابابا كان صح جدا جدا 

وفعلا لقيت مثال النسر دا وبشعر بيه فعلا - بغمض عيني واشوف نفسي طاير في الهوا - مش ملموس ومش متأثر بالعالم كله من تحتي. اللهم اهدنا يارب وارزقنا الايمان والتواضع والرضا 

شكرا يا بابا علي اهتمامك بيا وتربيتي تربيه صالحه ووجودك معايا طول الوقت حتي اليوم اللي نسيت فيه البطاقه في الحلميه وانا فكشف التجديد كلمتك عالتليفون وموقفش جنبي حد غير حضرتك يا بابا.  مل ايامي في المدرسه كل السنين ابتدائي واعدادي وثانوي وجامعه وحتي الشغل برضه واقف جنبي انا واخواتي بتوصلنا لحااد الباب… فاكر لما وقفت جنبي في ليله ضرسي لما كان واجعني وحزنت عليا وانا مخدتش بالي انك زعلت، حضرتك حكيتلي بعدين. دايما بتحس بيا انا واخواتي وماما. عمرك مابتشتكي او ترفض حاجه. دفعتلي الديون بكل فلوسك ودا شي كبير جدا جدا جدا.. قبولك للمواقف الصعبه والقرارات الصعبه دي بكل قلب دا شي عظيم جدا فعلا قوه وتحمل وشده وعظمه اب ليس لها مثيل. 

انا في حياتي لم ار اعظم منك يا ابي

العظمه لله ولكن كإنسان فيه صفات العظمه وطاهر في قلبه وشديد بلا شكوي او اظهار الرفض والاستسلام امام الاعمال الصعبه المرهقه مثلما اري حتي من بعض الناس فهو لا ولم ولن يحدث منك يا ابي ابدا ابدا 

ابي انت من جعلني هذا النسر

انا ابن هذا الرجل الذي عرفني كيف اقرأ القرآن وكيف اقرأ الحديث وما هي اركان الاسلام الخمسه وصور من حيات الصحابه واحاديث الرسول صلي الله عليه وسلم… ابي هو من يمسك بزمام الامور… يتحكم في امور وحياة كل البيت في لوساكا فعلا له التقدير والشكر والاحترام وعند وجودي في مصر كنت اعيش تحت جناحه …. والله اشعر بالتقصير تجاه والداي جدا في هذه الزياره وارجو ان تتكرر واعوض ما فاتني.

هذا النسر وإِيماني بنفسي ومعرفتي قيمتي وتقديري لذاتي كله اتي من ابي وامي لأن ابي دائما يقول (ملكش دعوة بعد) (طظ في الناس) (انت احسن من الناس كلها) دايما دايما اتعلمت منه الجمل دي والحمد لله دخلت دماغي وقلبي

فخور جدا اني ابنك يا بابا، فخور جدا اني زي مانا كدا، بحب افكر واتفكر واقرأ - كل دا لاني ابنك مفيش حاجه اتعلمتها من نفسي 

الحمد لله 

ما انا الا نتاج والداي وتربية والداي كل شي تعلمته منهم ورأيته منهم 

كل النعم من الله ثم من الاهل. بابا حبيبي العزيز بارك الله لك وبارك لك في صحتك وعقلك ومالك وعملك ويارب اللهم ارزقني الوقت والصحه والعمر ان ارد دائما الجميل ضعفين وثلاثة … هذه ليست الرساله الاخيره ان شاء الله فأنا احب الكتابه وسأكتب مجددا 

أحمد ابنك

٢ اغسطس ٢٠٢٣